DIOPLÓMA IARCHÉIME SAN AISTRIÚCHÁN AGUS SAN EAGARTHÓIREACHT (AR LÍNE)

Cé go bhfuil an clár dírithe go príomha ar dhaoine ar mian leo a bheith ag obair mar aistritheoirí agus mar eagarthóirí, agus ar dhaoine atá ag obair sna hearnálacha sin cheana féin, rachadh sé chun sochair freisin do dhaoine a bhíonn ag obair trí Ghaeilge in earnáil ar bith agus ar mian leo feabhas a chur ar a gcuid scileanna teanga.

Tá céimithe de chuid an chúrsa seo ag obair i réimse leathan ról – mar aistritheoirí, léitheoirí profaí, eagarthóirí, dlítheangeolaithe, oifigigh Ghaeilge, múinteoirí agus léachtóirí, cuir i gcás.  Tá poist bainte amach acu in institiúidí de chuid an Aontais Eorpaigh, i ranna agus eagraíochtaí Stáit, i ngníomhaireachtaí aistriúcháin, i scoileanna agus ollscoileanna, sna meáin, agus i gcomhlachtaí foilsitheoireachta.

Aiseolas ó chéimithe an Dioplóma Iarchéime san Aistriúchán agus san Eagarthóireacht

"Chuir mé spéis sa chúrsa an chéad lá riamh, mar cé go raibh mé ag obair mar aistritheoir, ní raibh aon cháilíocht ghairmiúil agam i léann an aistriúcháin. Lena chois sin, bhí mé ag iarraidh feabhas a chur ar mo chuid Gaeilge le tamall. Chuidigh an cúrsa liom an dá sprioc sin a bhaint amach. Is iontach an léargas a thugtar sna léachtaí ar gach gné den aistriúchán. Déantar cur síos ar chineálacha éagsúla téacs agus tugtar treoir conas dul i ngleic leo go héifeachtach. Sin ráite, is cúrsa praiticiúil é agus is iad na cleachtaí seachtainiúla a iarrtar ar na mic léinn a dhéanamh an chuid is luachmhaire de. Bhí deis againn tabhairt faoi gach aon seánra, téacsanna reachtaíochta, tuarascálacha, bileoga eolais, fógraí agus saothair litríochta ina measc. Gach uair, fuair muid aiseolas cuimsitheach ón teagascóir, idir cheartúcháin agus mholtaí spreagúla le go bhféadfadh muid barr feabhais a chur ar ár gcuid scríbhneoireachta. D’fhoghlaim muid bunscileanna téarmaíochta agus conas eagarthóireacht a dhéanamh ar aistriúchán. Go deimhin, ba dheacair ullmhúchán ní b’fhearr a shamhlú le dul ag obair mar aistritheoir gairmiúil. Molaim go mór é!” 

-INDREK 2020

"Bhain mé sult agus tairbhe as an Dioplóma Iarchéime. Na buanna is mó atá ag an gcúrsa dar liom ná gur féidir dul dó go páirtaimseartha agus gur féidir a bheith lonnaithe in áit ar bith. Tá na léachtaí suimiúil agus cuimsítear réimse leathan ábhar iontu. Fuaireas tuiscint mhaith ar cheird agus ar ealaín an aistriúcháin. Fuaireas aiseolas rialta mionsonraithe a chabhraigh go mór liom. Chuir an cúrsa go mór le mo thuiscint ar an nGaeilge, go háirithe gnéithe den teanga nach ndírítear orthu in áiteanna eile. Is fearr i bhfad mo thuiscint ar stíl, ar dhul na Gaeilge, agus ar an ngá a bheith intuigthe agus soiléir, leis. Tá an téarmaíocht theicniúil agam an t-ábhar a phlé, leis. Chuir an cúrsa seo ar mo chumas cinntí dlisteanacha a dhéanamh i gcásanna a bhfuil doiléire nó flúirse roghanna ann sa Ghaeilge. Molaim é.'

-EOIN, 2018

“Ní dócha gur mór an méid daoine atá i mbun scríobh na Gaeilge nach dtagann amhras éigin orthu faoina mbíonn á scríobh acu maidir le cruinneas agus le stíl. Fiú an té a bhfuil ardchumas aige nó aici sa teanga, bíonn gá aige le treoir agus le critic lena chumas a fheabhsú agus tugtar an chabhair agus an treoir sin duit ar an Dioplóma Iarchéime san Aistriúchán agus san Eagarthóireacht... Pléitear na fadhbanna a ghabhann leis an aistriúchán go Gaeilge agus na cineálacha éagsúla aistriúcháin. Tugtar aiseolas luachmhar ar na cleachtaí a thugtar agus cuirtear ar a shúile don mhac léinn na gnéithe den teanga scríofa aige atá lochtach nó lag. Ba mhór an chabhair an t-eolas agus an treoir a tugadh dom agus mé i mbun an chúrsa agus mholfainn go mór é don té ar spéis leis scríobh na Gaeilge.”
– TADHG, 2015

 “Bhí an t-aiseolas a thug na hoidí ó thús deireadh an chúrsa ar fheabhas... Braithim anois go bhfuil tuiscint níos fearr agam ar an rud is aistriúchán maith ann agus gur féidir liom díriú ar ábhar ar bith ach tarraingt ar an dea-chomhairle agus ar an oiliúint a cuireadh ar fáil dom ar an gcúrsa Dioplóma.”
– CLARE, 2014 

“Toisc gur cúrsa páirtaimseartha atá ann a chuirtear ar fáil ar líne, bhí an deis agam leanúint le mo chuid oibre agus feabhas a chur ar mo scileanna teanga ag an am céanna... Tá na scileanna a d’fhoghlaim mé agus mé ag gabháil don Dioplóma Iarchéime tar éis dul chun sochair go mór dom i gcomhthéacs na hoibre."
– ORLA, 2013

“Tá na scileanna a shealbhaigh mé le linn an chúrsa aistriúcháin fíorluachmhar anois. Ní hamháin sin ach tá tuiscint i bhfad níos doimhne agam ar ghramadach na Gaeilge, scil eile atá fíorthábhachtach agus mé ag scríobh gach lá.”
– ÚNA, 2012

“Dhá phríomhbhua atá ag an gcúrsa seo: a fheabhas atá sé ó thaobh cruinneas Gaeilge agus scileanna aistriúcháin de, agus an deis a thugann sé d’ábhair aistritheoirí cáilíocht phraiticiúil a bhaint amach go páirtaimseartha cibé áit ina bhfuil siad, as siocair gur cúrsa ar líne é.”
– AUSTIN, 2010

“Bhí fiúntas as cuimse san aiseolas a thugtaí faoin obair leanúnach agus […] is mór an tairbhe a bhainim as ar fhoghlaim mé ar an gcúrsa le linn mo chuid oibre mar aistritheoir sa Choimisiún Eorpach.”
– ROIBEARD, 2010

“Nuair a rinne mé an cúrsa bhí mé ag obair sa státchóras agus ba mhór an buntáiste é don rannóg ina raibh mé go raibh duine leis na scileanna agus an tuiscint ar theoiric an aistriúcháin ar fáil go hinmheánach. Táim ag obair le cúrsaí eagarthóireachta anois agus bím ag obair ar rudaí difriúla an t-am ar fad, mar shampla, ailt d’irisleabhair agus scripteanna teilifíse.”
– MARIE, 2009